លោក ពៅ សោមាណាក់ ប្រធានមន្ទីរបរិស្ថានខេត្តកណ្ដាល ចូលរួមក្នុងកម្មវិធី "ទិវាសំអាតពិភពលោកលើកទី៩ ឆ្នាំ២០២៦ នាព្រឹកថ្ងៃសុក្រ ៧កើត ខែភទ្របទ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី១៨ ខែកញ្ញា ឆ្នាំ២០២៦

 

លោក ពៅ សោមាណាក់ ប្រធានមន្ទីរបរិស្ថានខេត្តកណ្ដាល អញ្ជើញចូលរួមជាអធិបតីក្នុង «ទិវាសំអាតពិភពលោកលើកទី៩ ឆ្នាំ២០២៦» ក្នុងស្មារតីរួមគ្នាថែរក្សាបរិស្ថានសហគមន៍
​ខេត្តកណ្តាល៖ នាព្រឹកថ្ងៃសុក្រ ៧កើត ខែភទ្របទ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី១៨ ខែកញ្ញា ឆ្នាំ២០២៦ នេះ លោក ពៅ សោមាណាក់ ប្រធានមន្ទីរបរិស្ថានខេត្តកណ្ដាល បានអញ្ជើញចូលរួមជាអធិបតីភាព និងដឹកនាំដោយផ្ទាល់នៅក្នុងយុទ្ធនាការ «ទិវាសំអាតពិភពលោកលើកទី៩ (World Cleanup Day) ឆ្នាំ២០២៦»។ កម្មវិធីដ៏មានសារៈសំខាន់នេះ មានការចូលរួមយ៉ាងផុសផុលពីសំណាក់ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ អាជ្ញាធរដែនដីគ្រប់លំដាប់ថ្នាក់ លោកគ្រូ អ្នកគ្រូ សិស្សានុសិស្ស យុវជន ក៏ដូចជាបងប្អូនប្រជាពលរដ្ឋជាច្រើនកុះករ។
​ការរៀបចំទិវាសំអាតពិភពលោកនៅឆ្នាំនេះ ធ្វើឡើងក្នុងគោលបំណងសំខាន់ដើម្បីដាស់តឿន និងបំផុសស្មារតីសាធារណជនទូទៅ ឱ្យងាកមកយកចិត្តទុកដាក់កាន់តែខ្លាំងចំពោះបញ្ហាបរិស្ថាន ជាពិសេសការគ្រប់គ្រងសំណល់រឹងទីប្រជុំជន និងការកាត់បន្ថយការប្រើប្រាស់ប្លាស្ទិក ដែលកំពុងជាបញ្ហាប្រឈម។ តាមរយៈសកម្មភាពចុះរើសសំរាម និងសម្អាតអនាម័យតាមដងផ្លូវ ទីប្រជុំជន និងទីតាំងសាធារណៈនានា យុទ្ធនាការនេះបានបង្ហាញយ៉ាងច្បាស់ពីសាមគ្គីភាព និងការទទួលខុសត្រូវរបស់ប្រជាពលរដ្ឋ ក្នុងការរួមចំណែកធ្វើឱ្យសហគមន៍របស់ខ្លួនមានភាពស្រស់បំព្រង។
​ថ្លែងទៅកាន់អង្គពិធីនាឱកាសនោះ លោក ពៅ សោមាណាក់ បានមានប្រសាសន៍គូសបញ្ជាក់យ៉ាងដូច្នេះថា៖ «បរិស្ថានស្អាត សហគមន៍ស្រស់បំព្រង គឺផ្តើមចេញពីការចូលរួមចំណែករបស់យើងម្នាក់ៗ»។ លោកបានសង្កត់ធ្ងន់ថា ការចូលរួមសម្អាតបរិស្ថានមិនមែនធ្វើឡើងតែមួយថ្ងៃក្នុងមួយឆ្នាំ ដើម្បីតែអបអរទិវានេះនោះទេ ប៉ុន្តែវាជាកាតព្វកិច្ច និងទម្លាប់ប្រចាំថ្ងៃរបស់យើងគ្រប់ៗគ្នា។
​បន្ថែមពីនេះ លោកប្រធានមន្ទីរបរិស្ថានខេត្ត ក៏បានធ្វើការអំពាវនាវយ៉ាងទទូចដល់បងប្អូនប្រជាពលរដ្ឋទាំងអស់ ឱ្យបន្តចូលរួមអនុវត្តឱ្យបានខ្ជាប់ខ្ជួននូវវិធានការនានារបស់ក្រសួងបរិស្ថាន ពិសេសការទុកដាក់សំរាមឱ្យបានត្រឹមត្រូវតាមបច្ចេកទេស ការញែកសំរាម និងចៀសវាងដាច់ខាតនូវការបោះចោលពាសវាលពាសកាល ដែលបង្កផលប៉ះពាល់ដល់សុខភាពសាធារណៈ សោភ័ណភាព និងការទាក់ទាញភ្ញៀវទេសចរ។

​«ទិវាសំអាតពិភពលោកលើកទី៩ ឆ្នាំ២០២៦» នេះ បានបញ្ចប់ទៅក្រោមបរិយាកាសសប្បាយរីករាយ និងមោទនភាពក្រៃលែង បន្ទាប់ពីបរិមាណសំណល់ និងសំរាមជាច្រើនតោនត្រូវបានប្រមូល និងបញ្ជូនទៅទីលានចាក់សំរាមប្រកបដោយសុវត្ថិភាព។ ព្រឹត្តិការណ៍នេះ មិនត្រឹមតែធ្វើឱ្យខេត្តកណ្តាលកាន់តែមានសោភ័ណភាពប៉ុណ្ណោះទេ ថែមទាំងបានបន្សល់ទុកនូវសារអប់រំដ៏មានតម្លៃ សម្រាប់កូនចៅជំនាន់ក្រោយឱ្យចេះស្រឡាញ់ និងចូលរួមការពារមាតាធម្មជាតិជារៀងរហូតតទៅ៕